العدد الخامس والاربعون - تشرين الثاني

ما قلي وقلتلو (الجزء الثاني)

سعيد ملاعب
الثلاثاء 17 تشرين الثاني (نوفمبر) 2009.
 

 

قمار ومنطق! :

قلتلو : انت بعد بدو ينخرب بيتك من ورا لعب لقمار.

قلي  : وك يا سعيد، لو عندي بيت ما كنت بلعب قمار.

حاجز درك تاني :

قلي  : ليش مش حاطط حزام الامان.

قلتلو : لان البلد ما في أمان.

قلي  : وعم بتنكت كمان + زبط (صارو زبطين بهَ الشهرين، عنوان قصيدة كأنو)

بنت رفيقتي بدا مني مصاري :

قالتلي : بتعرف في مثل بيقول المديون كلب

قلتلا : مش محددين المبلغ؟

شب دون جوان :

قلي  : بتعرف أنا المرا اللي بتحكي معي، مع زوجا ما بتعود تحكي.

قلتلو : يا ريت فيك تخدمني، بس أنا مش مجوز.

جور ومطبات :

قلي  : وك يا سعيد انت لو بتخفف ع المطبات والجور ما كانت سيارتك بتضل بالتصليح.

قلتلو : يا صديقي ازا بدي خفف عَ كل المطبات والجور بوصل ع شغلي بلاقي زملائي عم بحمو سياراتن وفالين.

مزح بمزح :

قلي  : ليك أنا بعتِرف. انا كلب مرتي.

قلتلو : وأنا كمان، كلب مرتَك.

أجزاء :

قلي : عرفت بسام الملا بدو يعمل جزء خامس من باب الحارة.

قلتلو : أنا شايف راح نوصل للجزء اللي فاتو فيه السوريين ع لبنان.

 

رومانسية2 :

قالتلي : حياتي عن جد شو بيعنيلك 4 الشهر.

قلتلا : من 3 تيام قبضت!

 

أقرأ باسم ربك الذي خلق :

قلتلا : ماما ما احساب منا نشتي ع المازوت السنة؟

قالتلي : كَ سندي عنا جرايد كتير، خلينا نوفر ع حالنا!

 

ملاحظة : نيال الاطرش اجاه صبي سماه "سامع".

 

سعيد ملاعب